පරිවාස හා ළමාරක්ෂක සේවා දෙපාර්තමේන්තුව

අප පිළිබඳව

දෙපාර්තමේන්තු හැඳින්වීම

ළමා පරපුර යනු රටක ඉදිරි සංවර්ධන කාර්යයේ හා සමාජීය අභිවෘද්ධියේ මූලික සාධකයක් ලෙස හැඳින්විය හැකිය. එබැවින් ළමා පරපුර හා බැඳුණු යහපත් හෝ අයහපත් යම් කිසි ක්‍රියාදාමයක් වෙතත් ඒ පිළිබඳව අවධානය යොමු කිරීම වැඩිහිටි අප කාගෙත් යුතුකමකි.

පිළිගත් සාරධර්ම, සිරිත් විරිත් හා සම්මතයන් අනුවත් පනවාගත් නීතිරීති අනුවත් කටයුතු කිරීම සියලු සමාජයන්හි අපේක්ෂාවයි. අපේක්ෂාවන් සපිරුණු සමාජයක ජීවත්වීම පුද්ගල පැතුමයි. සමාජයේ පුද්ගලයන්ගේ අන්‍යෝන්‍ය ක්‍රියාකාරීත්වයන් සහ එක් එක් පුද්ගලයාගේ ක්‍රියාකාරීත්වයන් සමාජය කෙරෙහි සෘජුව මෙන්ම පෞද්ගලිකවද බලපෑම් ඇති කරයි. එබැවින් ක්‍රියාකාරකම්වල කළමනාකරණයක් පැවතීම අවශ්‍ය වේ. එම නිසා සමස්ත සමාජයෙහි වගකිව යුත්තෝ එම තත්ත්වයන් කළමනාකරණය කරනු ලබන්නෝ වෙති.

මෙම දෙපාර්තමේන්තුවද එවැනි වගකීම් දරන දෙපාර්තමේන්තුවක් වන අතර ළමාරක්ෂක විෂයට අදාළ කාර්යභාරය මෙම දෙපාර්තමේන්තුව වෙත පැවරී ඇත. යම් පුද්ගල හැසිරීම් ඒ ඒ සමාජ ක්‍රමයට අනුගතව ක්‍රියාත්මක නොවන අවස්ථාවලදී එකී චර්යාවන් සමාජ හිතකර ආකාරයෙන් සකස් කිරීමට සහ සමාජ හිතකාමී චර්යාවන් වැඩිදියුණු කිරීමට දෙපාර්තමේන්තුව ක්‍රියාත්මක වේ.

වරදකරුවන් සිරගත කිරීමට පමණක් සීමා නොවී ඔවුන් ප්‍රජාව තුළම රඳවා සමාජයට යාවත්කාලීනව අනුගත කරගැනීමට “පරිවාස සේවාව” ආරම්භ වී ඇත. නීතිගරුක ප්‍රජාවක් සහ සුරක්ෂිත ළමා පරපුරක් පළාත තුළ බිහිකිරීමේ මූලික පරමාර්ථය ඇතිව පිහිටුවන ලද උතුරු මැද පළාත් පරිවාස හා ළමාරක්ෂක සේවා දෙපාර්තමේන්තුව තම අරමුණු හා කාර්යභාරය තිරසර සංවර්ධන අරමුණු හා ගළපා ගනිමින් එම අරමුණු ඉටුකර ගැනීම සඳහා සුවිශාල කාර්යභාරයක් පළාත තුළ ඉටු කරනු ලබයි.

ඉතා සංකීර්ණ මෙන්ම සංවේදී විෂය පරාසයක් ඔස්සේ දිව යන මෙම දෙපාර්තමේන්තු කාර්යභාරය ජනතාව වෙත සමීප කරනු වස් උතුරු මැද පළාත තුළ පිහිටි අධිකරණ කලාප 09ක් තුළ පරිවාස කාර්යාල පිහිටුවමින් තම සේවාව පළාත පුරා ක්‍රියාත්මක කර ජනතාව වෙත ඵලදායි සේවාවක් ලබාදීමට අවශ්‍ය කටයුතු සලසා ඇත.

පළාත පුරා ළමා සංවර්ධන මධ්‍යස්ථාන පවත්වාගෙන යනු ලබන අතර, දෙපාර්තමේන්තු කළමනාකාරීත්වය යටතේ ආයතන 08ක් හා ස්වේච්ඡා සංවිධාන කළමනාකාරීත්වය යටතේ ආයතන 07ක් පවත්වාගෙන යනු ලැබේ.

නිවාසගත වීමට හේතුවන කරුණු හඳුනාගෙන ඒ සඳහා විසඳුම් ලබාදීමද මෙම දෙපාර්තමේන්තු කාර්යයන් අතර ප්‍රමුඛ වේ.